Enwi, cymhwyso a chychwyn

1.–(1) Enw'r Rheoliadau hyn yw Rheoliadau Bwyd at Ddefnydd Maethol Neilltuol (Diwygiadau Amrywiol) (Cymru) 2010.

(2) Mae'r Rheoliadau hyn yn gymwys o ran Cymru a deuant i rym ar 15 Mawrth 2010.

Diwygio Rheoliadau Labelu Bwyd 1996

2.–(1) Diwygir Rheoliadau Labelu Bwyd 1996(5) yn unol â'r paragraffau canlynol i'r graddau y maent yn gymwys i Gymru.

(2) Ym mharagraff (1) o reoliad 2 (dehongli)–

(a) hepgorer y diffiniad o "Directive 89/398"(6);

(b) yn syth ar ôl y diffiniad o "Directive 2000/13" mewnosoder y diffiniad canlynol–

""Directive 2009/39" means Directive 2009/39/EC of the European Parliament and of the Council on foodstuffs intended for particular nutritional uses(7) as amended from time to time;".

(3) Yn rheoliad 3 (esemptiadau), yn lle is-baragraff (iv) o baragraff (1) rhodder yr is-baragraff canlynol-

"(iv) where applicable, the requirements of Directive 87/250, Directive 90/496, Directive 94/54, Directive 99/2 and Directive 2009/39 are met in respect of that food.".

Diwygio Rheoliadau Hysbysiadau o Farchnata Bwyd at Ddefnydd Maethol Neilltuol (Cymru) 2007

3.–(1) Diwygir Rheoliadau Hysbysiadau o Farchnata Bwyd at Ddefnydd Maethol Neilltuol (Cymru) 2007(8) yn unol â'r paragraffau a ganlyn.

(2) Ym mharagraff (1) o reoliad 2 (dehongli), yn lle'r diffiniad o "y Gyfarwyddeb" ("the Directive") rhodder y diffiniad canlynol–

• "ystyr "y Gyfarwyddeb" ("the Directive") yw Cyfarwyddeb 2009/39 Senedd Ewrop a'r Cyngor ar ddeunyddiau bwyd a fwriedir at ddefnydd maethol neilltuol, fel y'i diwygir o bryd i'w gilydd;".

(3) Yn rheoliad 3 (cyfyngiad ar werthu)–

(a) yn lle paragraff (1) rhodder y paragraff canlynol–

"(1) Ni chaiff neb, mewn perthynas â chynnyrch bwyd DMN o fath neilltuol–

(a) sydd yn weithgynhyrchydd neu'n fewnforiwr y cyfeirir ato yn Erthygl 11 o'r Gyfarwyddeb, ond

(b) sydd wedi methu â chydymffurfio–

(i) â gofyniad i hysbysu'r awdurdod cymwys, fel y cyfeirir ato yn is-baragraff (a) neu (b) o baragraff (1) o'r Erthygl honno, neu

(ii) â gofyniad i ddangos unrhyw beth i'r awdurdod cymwys, fel y cyfeirir ato yn is-baragraff (c) o baragraff (1) o'r Erthygl honno,

werthu cynnyrch bwyd DMN o'r math hwnnw."; a

(b) yn is-baragraff (b) o baragraff (2) yn lle "Erthygl 9" rhodder "Erthygl 11".

(4) Ym mharagraff (1) o reoliad 4 (datganiad), yn lle "Erthygl 1(2)" rhodder "Erthygl 1(2) a (3)".

Nodyn Esboniadol

(Nid yw'r nodyn hwn yn rhan o'r Rheoliadau)

1. Mae'r Rheoliadau hyn, sy'n gymwys o ran Cymru, yn diwygio Rheoliadau Labelu Bwyd 1996 (O.S. 1996/1499, fel y'i diwygiwyd eisoes) a Rheoliadau Hysbysiadau o Farchnata Bwyd at Ddefnydd Maethol Neilltuol (Cymru) 2007 (O.S. 2007/1040 (Cy. 100)) er mwyn adlewyrchu diddymu ac amnewid Cyfarwyddeb y Cyngor 89/398/EC ar gyd-ddynesiad cyfreithiau'r Aelod-wladwriaethau sy'n ymwneud â deunyddiau bwyd a fwriedir at ddefnydd maethol neilltuol (OJ Rhif L186, 30.6.1989, t.27) gan Gyfarwyddeb 2009/39/EC Senedd Ewrop a'r Cyngor ar ddeunyddiau bwyd a fwriedir at ddefnydd maethol neilltuol (OJ Rhif L124, 20.5.2009, t.21).

2. Mae'r Rheoliadau hyn yn diwygio Rheoliadau Labelu Bwyd 1996 (sy'n rhychwantu Prydain Fawr i gyd), i'r graddau y maent yn gymwys o ran Cymru, drwy hepgor y diffiniad o "Directive 89/398" o reoliad 2(1) a mewnosod diffiniad o "Directive 2009/39" yn y ddarpariaeth honno, a rhoi cyfeiriad at "Directive 2009/39" yn lle cyfeiriad at "Directive 89/398" yn rheoliad 3(1)(iv) (rheoliad 2).

3. Mae'r Rheoliadau hyn yn diwygio Rheoliadau Hysbysiadau o Farchnata Bwyd at Ddefnydd Maethol Neilltuol (Cymru) 2007 drwy roi diffiniad diwygiedig o "y Gyfarwyddeb" yn lle'r diffiniad presennol o "y Gyfarwyddeb" yn rheoliad 2(1) fel bod y diffiniad yn cyfeirio at Gyfarwyddeb 2009/39/EC yn lle at Gyfarwyddeb 89/398/EEC a thrwy roi cyfeiriadau at ddarpariaethau penodol yng Nghyfarwyddeb 2009/39/EC yn lle'r cyfeiriadau presennol at ddarpariaethau penodol yng Nghyfarwyddeb 89/398/EEC yn rheoliadau 3 a 4 (rheoliad 3).

4. Nid oes asesiad effaith rheoleiddiol wedi ei baratoi ar gyfer yr offeryn hwn gan na ddisgwylir y bydd rhoi'r Rheoliadau hyn ar waith yn gosod unrhyw gostau ar ddefnyddwyr, busnesau neu awdurdodau gorfodi.